Пазарните инспектори излегоа на терен за вонредни контроли откако на социјалните мрежи се појавија информации дека на одредени бензински станици не се точи гориво.
Директорот на Државниот пазарен инспекторат, Стојкоски, изјави дека во изминатите три дена биле спроведени над 270 контроли низ целата држава. При инспекциите било утврдено дека кај дваесетина бензински станици имало привремен недостиг на гориво, кој траел само од еден до два часа додека се дополнат резервоарите, по што точењето продолжувало нормално. Поради тоа, не биле изречени казни.
Причината за недостигот, според Стојкоски, е наглото зголемување на побарувачката, кое во некои случаи било и до четири пати поголемо од вообичаеното. Тој ја потврди и премиерот Христијан Мицкоски:
– Во пограничните општини има голем притисок од соседните држави, каде цените на енергенсите се 40-50% повисоки од кај нас. На пример, дизелот во Србија е 120-130 денари за литар, додека кај нас е 71 денар. Поради тоа, се бележи огромно зголемување на потрошувачката, што можеби предизвикало недостиг на одредени пумпи, изјави Мицкоски.
Законски лимит и контрола на странски возила
За ограничувањата на потрошувачите да точат најмногу до 50 литри гориво, Стојкоски посочи дека мерката е законска. Лимитот е воведен поради случаи во кои странски камиони точеле и до два тони гориво и го напуштале државата, што можело да предизвика недостиг за домашните потрошувачи.
Регулаторната комисија за енергетика утре ќе донесе одлука за нови цени на дериватите, а премиерот Мицкоски изјави дека Владата ќе интервенира веднаш ако има драматичен скок на цените, преку намалување на акцизата или ДДВ-то.
Одлуките за новите цени на горивата ќе се носат еднаш неделно, секој понеделник, а правилникот е изменет за да се обезбеди сигурност во снабдувањето.
