На годишниот натпревар за најгрдото куче на светот, кој традиционално се одржува во Калифорнија, годинава титулата ја понесе двегодишната Петунија – мешавина од англиско и француско булдог од Јуџин, Орегон. Настанот се одржа на 8 август на саемот во округот Сонома во Санта Роса, а победничката освои парична награда од 5.000 долари и договор нејзиниот лик да се појави на лименки со ограничено издание на спонзорот Mug Root Beer.
Петунија е спасена од опасни услови во Лас Вегас, каде била дел од нелегални борби со кучиња. Во Орегон ја донела хуманитарната организација „Luvable Dog Rescue Service“, каде ѝ била обезбедена медицинска помош – стерилизација и операција за корекција на расцеп на непце, што ѝ предизвикувало потешкотии при дишењето. Денес, таа живее со својата сопственичка Шенон и е опишана како мирна и нежна душа која обожава луѓе и животни.
Натпреварот, кој се одржува речиси половина век, има за цел да ги слави „несовршеностите“ на кучињата и да поттикне посвојување од засолништа. Конкуренцијата годинава вклучувала повеќе необични миленици, меѓу кои и Малиот принц Вондер и 13-годишната чивава Незуми.
Минатата година титулата ја освои осумгодишниот пекинезер Вајлд Тенг, кој учествуваше на натпреварот пет години по ред.
