Просечната цена на квадратен метар во Белград се движи од 2.500 до 3.000 евра, а најбарани се станови за млади од 30 до 40 квадрати, кои чинат околу 100.000 евра.
Агентот за недвижности Милиќ Ѓоковиќ објаснува дека цените на периферијата се пониски, меѓу 1.000 и 1.500 евра по квадрат, додека во елитните делови достигнуваат и до 12.000 евра по метар квадратен.
Исто така, има побарувачка и за станови со површина од 50 до 60 квадрати, чии цени се од 150.000 до 180.000 евра.
– Во моментов најбарани се становите за млади, односно оние од 30-40 квадрати со цена од околу 100.000 евра. Во поширокото градско јадро, просечната цена е околу 2.500 до 3.000 евра по квадрат – вели Ѓоковиќ.
Тој посочува дека цените ги диктира понудата и дека додека таа е поголема од побарувачката, цените ќе растат.
– Покрај тоа, недостигот на градежни дозволи во изминатата и оваа година влијае на зголемувањето на цените, бидејќи побарувачката останува постојана, а понудата е помала – додава агентот.
Во врска со информациите дека 60% од купувачите плаќаат станови кеш, Ѓоковиќ вели дека тоа не е вистински кеш, туку дека се работи за поврзани трансакции, каде еден кредит служи за повеќе купопродажби.
– На пример, некој продава стан со кредит од 200.000 евра, потоа купува друг стан од некој друг што пак купува нов и така натаму. Четири трансакции се поврзани со еден кредит, така што не е вистински кеш – објаснува тој.
Кога станува збор за гаражите, кои во Белград чинат и до 66.000 евра, Ѓоковиќ вели дека цените ќе продолжат да растат, бидејќи постои голема потреба за паркинг-места.
Тој им советува на оние што немаат доволно пари за стан, но сакаат да инвестираат, да купат гаражно место, бидејќи „гаражниот бизнис“ е многу исплатлив.
– Нема трошоци за одржување, не може да се расипе бојлер, или подстанар да однесе телевизор, а повратот на вложените пари е многу добар – вели Ѓоковиќ.
