САД, Иран и повеќе регионални посредници водат интензивни разговори за можен договор кој би можел да донесе привремен прекин на конфликтот, а потоа и негово целосно завршување. Според информации објавени од „Аксиос“, повикувајќи се на американски, израелски и регионални извори, се разгледува опција за 45-дневно примирје, иако шансите за конечен договор засега се оценуваат како мали.
Планот што се разгледува предвидува две фази. Во првата, би се воспоставило привремено примирје од 45 дена, период во кој би се воделе интензивни преговори за трајно запирање на војната. Доколку биде потребно повеќе време, ова примирје би можело и да се продолжи. Втората фаза би вклучувала конечен договор со кој би се ставил крај на конфликтот.
Сепак, ситуацијата дополнително се заострува по изјавите на американскиот претседател Доналд Трамп, кој постави јасен рок – до вторник навечер Иран да го отвори Ормускиот теснец за поморски сообраќај. Во спротивно, најави сериозни напади врз клучна инфраструктура.
Трамп во изјава за американски медиум предупреди дека последиците ќе бидат тешки, наведувајќи дека Иран би можел да остане без електрани и мостови доколку не постапи според барањата.
Дополнително, тој објави и остра порака на социјалните мрежи, во која повторно се закани со силни напади, нагласувајќи дека ќе „ослободи хаос“ доколку ултиматумот не биде исполнет. И покрај ваквата реторика, посочи дека сè уште постои „добра шанса“ за постигнување договор.
Од друга страна, Иран остро реагираше на овие закани, отфрлајќи ги како неосновани и оценувајќи ги како знак на нервоза и слабост.
Целата ситуација останува неизвесна, а исходот од разговорите и поставениот рок може да донесе значаен пресврт во развојот на конфликтот.
