Воената база Форт Стјуарт во Џорџија денеска беше сцена на вооружен напад во кој се застрелани пет американски војници, што предизвика итно затворање на објектот и вонредни безбедносни мерки.
Инцидентот се случил околу 11:04 часот по локално време во зоната на борбениот тим на Втората оклопна бригада. Четворица од ранетите се пренесени во болница, додека еден војник останал на местото на нападот. Според изјавите на американската армија, осомничениот за нападот е веќе идентификуван, но неговиот идентитет сè уште не се открива.
Командантот на базата, полковник Вилијам „Гејб“ Вивер, нареди целосна блокада на Форт Стјуарт, како и на блиската воздухопловна база Рајт и Еванс. Сите војници и персонал добиле наредба да се заклучат во објектите и да ги држат комуникациските канали отворени.
Потполковник Ангел Томко потврди дека напаѓачот сè уште се наоѓа во базата и дека е во тек операција за негово неутрализирање. Полицијата и воената безбедност се распоредени на теренот, а сите влезови на базата се затворени.
Како дополнителна мерка на претпазливост, затворени се и неколку училишта во близина – „Батон Гвинет“, „Џозеф Мартин“ и средното училиште „Снелсон Голден“.
Гувернерот на Џорџија, Брајан Кемп, преку социјалната мрежа X изрази сочувство до семејствата на погодените, а конгресменот Бади Картер соопшти дека ситуацијата будно се следи. Истражните органи и воените служби работат на целосно расветлување на околностите околу нападот.
