Џејн Ета Пит, мајката на познатиот актер и оскаровец Бред Пит, почина на 84-годишна возраст, соопшти „Пипл“. Веста за нејзината смрт стана јавна преку емотивната објава на нејзината внука Сидни на Инстаграм, каде ја опиша како жена со „најголемо срце“ која безусловно се грижела за сите.
„Таа можеше да ги следи сите 14 внуци без да пропушти ништо. Љубовта што ја даваше немаше граници, и секој што ја запознаваше ја чувствуваше. Не знам како ќе продолжиме без неа... Бевме благословени што ја имавме и знам дека таа живее преку секој од нас“, напиша Сидни во чест на баба ѝ.
Џејн, која беше столб на семејството, работеше како семеен советник и ретко се појавуваше во јавноста, но понекогаш се појавуваше покрај својот син Бред и сопругот Вилијам на црвениот тепих. Нејзиниот мирен живот и посветеноста кон семејството ја правеа препознатлива личност меѓу блиските.
Бред Пит, заедно со своите помлади брат и сестра, израснале во Спрингфилд, Мисури, под силното влијание на нивната мајка.
На специјалната проекција на својот последен филм во јуни, Бред јавно ѝ се заблагодари на мајка си: „Морам да ја поздравам мајка ми, затоа што таа те гледа секое утро. До Џејн Пит. Те сакам, мамо“, рече тој, испраќајќи бакнеж преку видео клипот што го сподели „Тудеј“.
Џејн Ета Пит ќе остане запаметена како личност чија љубов и грижа оставија неизбришлив печат во животите на сите што ја познаваа.
