Ракометарите на РК Охрид вечерва во Прага го одиграа реванш-натпреварот против Дукла Прага во рамки на осминафиналето од ЕХФ Европски куп, но покрај спортската неизвесност, вечерта донесе и сцена што никој нема да ја заборави.
Во момент кога вниманието беше вперено кон теренот, атмосферата доби сосема поинаква димензија. Валентин клекна пред својата сакана Јована и пред сите присутни во салата ѝ го постави најважното прашање во животот. Без трошка двоумење, таа одговори со јасно и гласно „Да“, по што трибините експлодираа во аплауз и овации.
Спортската арена во Прага за миг се претвори во сцена од романтичен филм. Играчите, навивачите и присутните беа сведоци на емотивен чин што ја надмина резултатската важност на мечот. Радоста и емоциите беа видливи насекаде, а просидбата стана вистински врв на вечерта.
Од клубот од Охрид подоцна споделија фотографии од незаборавниот момент, нагласувајќи дека оваа европска авантура ќе се памети не само по спортската борба, туку и по љубовта што блесна посилно од рефлекторите во салата.
