По обилните врнежи што го зафатија регионот, Општина Кавадарци испрати значајна помош за граѓаните во Кичево, каде поплавите предизвикаа голема штета на домови и инфраструктура.
На терен се упатени две противпожарни возила со шест пожарникари, придружени со шест пумпи и дополнителна опрема за испумпување на водата и санирање на последиците.
„Солидарноста е нашата најголема сила – кога е најтешко, заедно сме на терен“, истакна кавадаречкиот градоначалник Митко Јанчев.
Активности за поддршка на погодените семејства
Станува збор за дел од координираните активности за помош на семејствата во Кичево. Поплавите ги зафатија домови, дворови и локална инфраструктура, а Кавадарци се приклучува кон интервенциите на други општини и институции.
Истовремено, во скопската општина Сарај повеќе од 30 домови се поплавени. На терен се интензивно ангажирани:
- Дирекцијата за заштита и спасување
- Центарот за управување со кризи
- Противпожарните единици од Тетово
- Противпожарната бригада на Град Скопје
- Екипи од Општина Ѓорче Петров и НПК Сарај
- Полициската единица Сарај
Градоначалникот Мухамед Елмази истакна дека сите институции се професионално и посветено ангажирани:
„Искрено им се заблагодаруваме на сите институции и тимови за нивниот солиден ангажман. Продолжуваме да работиме на целосно санирање на последиците, поддршка на погодените семејства и превентивни мерки за иднината“, додаде Елмази.
Надлежните остануваат на терен
Сите служби остануваат во целосна готовност и ќе продолжат редовно да ги информираат граѓаните за новите случувања, со цел да се обезбеди безбедност и брза реакција при какви било дополнителни поплави.
Доколку сакате да помогнете обратете се на Црвен Крст.
