Цените на становите денес излегуваат далеку над реалното и објективното ниво, вели Марјан Стефановски, директор на Акционерското друштво за изградба и стопанисување со станбен и деловен простор (АДИССДП). Според него, клучниот приоритет е да се воспостави стабилност на пазарот преку системски мерки кои ќе овозможат цени кои не се базираат на шпекулации, туку на реалните економски услови.
Стефановски објаснува дека актуелната состојба на пазарот е резултат на нарушена рамнотежа помеѓу понудата и побарувачката, што е особено изразено во последните години. За да се коригира ова, АДИССДП активно работи на проширување на градежните капацитети и изградба на нови комерцијални станбени згради. Овој пристап има за цел директно да влијае врз зголемувањето на понудата и така да придонесе за стабилизирање и намалување на цените на станбениот квадрат.
Во моментов се реализираат големи проекти низ државата: во Битола се градат два нови објекти со вкупно 125 станови, во Охрид се планираат две комерцијални згради со 130 станови, а во подготовка се проекти за над 260 нови станови во Скопје, Битола и Штип. Овие активности се дел од стратешкиот план на АДИССДП да ја зголеми понудата и да помогне во намалување на цените.
Дополнително, проектот за социјални станови кој е во завршна фаза, веќе резултира со 28 изградени објекти и над 1.700 станови, а во изградба се уште неколку нови згради во Сарај, Прилеп, Штип и Пехчево. Со ова се обезбедува дом за ранливите категории и социјално загрозените граѓани.
Стефановски истакнува дека покрај економските услови кои влијаат на цените (како што се трошоците за материјали и работна сила), државната поддршка и координацијата меѓу институциите се клучни за создавање на одржлив и пристапен станбен пазар.
Тој вели дека во наредниот период фокусот ќе остане на реализација на нови проекти, одржување на постојните објекти, како и на подобрување на условите за стопанисување со деловниот простор, со цел да се одржи стабилноста и функционалноста на пазарот.
