Претседателот на САД, Доналд Трамп, објави дека Израел ги прифатил неговите услови за прекин на огнот и упати директно предупредување до палестинската група Хамас да го стори истото.
„Сите сакаат заложниците да се вратат дома. Сите сакаат оваа војна да заврши!“, напиша Трамп на платформата Truth Social, која е негова сопственост. Тој додаде: „Израелците ги прифатија моите услови. Време е и Хамас да ги прифати“.
Трамп истакна дека ова е неговото последно предупредување кон Хамас, со закана за последици доколку групата ја одбие понудата: „Го предупредив Хамас за последиците од неприфаќањето. Ова е моето последно предупредување, нема да има друго!“
Израелските медиуми известија дека САД доставиле нов сет предлози за сеопфатен договор за прекин на огнот во Газа и ослободување на заложниците. Предлогот, сепак, не е целосно формулиран, туку претставува преглед на можни идни преговори.
Хамас истакна дека е отворен за договор кој ќе ја заврши војната, со услови како целосно повлекување на Израел, неограничен пристап до помош и други барања. Израелскиот премиер Бенјамин Нетанјаху, пак, нагласи дека ќе прифати само сеопфатен договор што вклучува ослободување на сите 48 заложници во Газа.
