Од 1 октомври 2025 година, во четири северни региони на Италија – Ломбардија, Пиемонт, Венето и Емилија-Ромања – ќе стапи на сила драстична забрана за движење на дизел возила со стандард Euro 5. Ограничувањето ќе трае во текот на работните денови сè до пролетта 2026 година, а потоа повторно ќе се воведува секоја есен и зима, како дел од пакетот мерки за борба против загадувањето.
Забраната ќе важи за сите градови со над 30.000 жители во овие региони, вклучувајќи ја и пошироката област околу Болоња, како и општините Фјорано Моденезе, Маранело и Рубиера. Тоа значи дека и локалните жители и патниците во транзит со Euro 5 возила ќе мора да се прилагодат на новите правила.
Работното време на ограничувањата е строго утврдено: во Ломбардија (Милано) од 7:30 до 19:30 часот, а во Пиемонт, Венето и Емилија-Ромања од 8:30 до 18:30 часот. За време на викендите и празниците забраната нема да важи.
Проценките покажуваат дека повеќе од еден милион автомобили во северна Италија се погодени од оваа мерка, бидејќи Euro 5 дизел возилата биле произведени меѓу 2011 и 2015 година. Сепак, системот Move-In овозможува делумно олеснување – со инсталација на GPS уред, сопствениците можат да користат автомобил до одреден годишен лимит на километри.
Мерката предизвикува сериозни политички тензии во земјата. Иако забраната е воведена врз основа на пресудите на Судот на правдата на ЕУ, министерот за транспорт Матео Салвини остро се спротивставува и бара нејзино укинување или барем одложување. Владата на Џорџо Мелони веќе размислува за одлагање, а законот што би можел да ја промени одлуката е ставен на гласање во парламентот, со конечен рок до средината на јули.
Италијанските возачи во исчекување – дали од октомври навистина ќе бидат принудени да ги остават своите автомобили во гаража?
