Италија се соочува со сериозен притисок во авио-сообраќајот, откако четири важни аеродроми – Болоња, Милано Линате, Тревизо и Венеција – воведоа ограничувања во снабдувањето со авионско гориво. Италијанската агенција АНСА објави дека Air BP Italia ги известила авиокомпаниите за рестрикции што ќе важат најмалку до 9 април, при што приоритет ќе имаат медицински летови, државни летови и летови подолги од три часа.
Иако ситуацијата засега не значи целосен прекин на летовите, проблемот отвори нова тревога во пресрет на празничниот период. Дополнителна загриженост предизвикува фактот што енергетските тензии во регионот веќе влијаат врз европското снабдување, а стравувањата се насочени кон тоа што би се случило ако кризата околу Ормутскиот теснец продолжи.
Во исто време, премиерката Џорџа Мелони е во интензивна дипломатска мисија во земјите од Заливот, со јасна цел да обезбеди стабилно снабдување со енергенси за Италија. Според Ројтерс, нејзината посета на Саудиска Арабија, Катар и Обединетите Арапски Емирати доаѓа токму поради растечките енергетски ризици и нарушувањата во испораките од регионот.
Италијанските власти засега смируваат дека нема место за паника, но јасно е дека кризата веќе почнува да удира и врз европските аеродроми. Ако застојот со снабдувањето потрае, проблемот би можел брзо да прерасне во многу поширок транспортен и економски удар.
