Единаесет лица се повредени при сериозен инцидент што се случи за време на карневалска парада во швајцарскиот град Шабли, во кантонот Вале, кога експлодирал уред за исфрлање конфети кој работел со компримиран воздух.
Според информациите од кантоналната полиција, експлозијата на компресорот се случила во момент кога парадата била во тек и кога голем број граѓани се наоѓале во близина. Неколкумина од повредените се здобиле со тешки телесни повреди и биле итно пренесени во болница со хеликоптер, додека останатите биле згрижени од медицинските екипи на терен.
На местото на настанот интервенирале четири амбулантни возила, три медицински хеликоптери и мобилна единица за интензивна нега, што укажува на сериозноста на ситуацијата и на бројот на повредени лица.
Полицијата започна истрага за да се утврдат причините за експлозијата и дали станува збор за технички дефект, неправилно ракување со уредот или пропусти во безбедносните протоколи. Засега не се соопштуваат дополнителни детали.
Организаторите на карневалот одбија да дадат изјава за медиумите, нагласувајќи дека чекаат официјални резултати од истрагата.
Инаку, властите во кантонот Вале неодамна ги заострија безбедносните мерки за јавни настани, по трагичниот пожар во Кран-Монтана на новогодишната ноќ, кога загинаа 41 лице. Новите прописи имаат за цел построга контрола на опремата и почитување на противпожарните и безбедносните стандарди на масовни собири.
Овој инцидент повторно ја отвори темата за безбедноста на јавните манифестации и потребата од строги технички проверки пред нивно одржување.
