Осудената сериска убијка Роуз Вест, која отслужува доживотна казна затвор уште од 1995 година, повторно се најде во фокусот на британските медиуми поради шокантни наводи за нејзиното однесување зад решетки.
Според извештаите, Вест со недели се приближувала до млади и ранливи затворенички, користејќи привидна љубезност – им правела шминка, фризури и дури подготвувала торти во одделението, со што стекнувала доверба пред наводно да ги манипулира и злоупотребува.
Британските медиуми откриваат дека 72-годишната Вест, која заедно со сопругот уби најмалку десет девојки и жени, неодамна била вмешана во сериозен инцидент во кој сексуално нападнала млада затвореничка, по што затворските власти итно ѝ ги одзеле сите привилегии.
Таа моментално е сместена во специјална затворска единица „Ривендел Хаус“ во затворот Њу Хол, во близина на Вејкфилд. Претходно уживала посебен третман – дополнителни средства во мензата, пристап до телевизија и ДВД-а, учество во активности како јога и плетење, па дури и слободно движење низ дворовите каде што се грижела за животни.
Поранешни затворенички сведочат дека Вест се однесувала „како ѕвезда“, а дел од персоналот, наводно, бил премногу попустлив кон неа.
„Изгледаше како кревка бабичка, но сите знаевме дека е исклучително опасна. Прво те освојува со внимание, а потоа ја покажува вистинската страна“, изјавил еден извор од затворот.
По најновиот скандал, управата целосно ѝ ги укинала привилегиите и ја ставила под построг надзор.
Инаку, ужасните злосторства на Вест и нејзиниот сопруг повторно станаа тема на јавноста преку документарната серија на Нетфликс Фред и Роуз Вест: Британска хорор приказна, која детално ги прикажува убиствата, манипулациите и животот зад затворските ѕидови.
И покрај тоа што помина три децении во затвор, Роуз Вест и натаму не признава вина, додека јавноста во Британија е згрозена од сознанијата дека и денес претставува опасност за околината.
