Грчката влада воведува строги мерки за спречување на пожари, со кои сопствениците на имоти ќе се соочат со казни до 2.000 евра доколку не ги одржуваат своите површини чисти. Новите правила се дел од законот „Активна борба“ на Министерството за климатски промени, кој има за цел да ја зголеми превенцијата од шумски и урбани пожари.
Со законот се зајакнува и Националниот регистар за усогласеност со мерките за противпожарна заштита, кој повеќе нема да функционира формално, туку ќе биде директно поврзан со задолжителни декларации, теренски контроли и интервенции од надлежните служби.
Рокот за чистење и пријавување на имотите е продолжен до 15 јуни. Сопствениците се обврзани да ги расчистат површините во периодот од 1 април до 15 јуни, а потоа да ги одржуваат чисти во текот на целата сезона со зголемен ризик од пожари. Општините ќе ги информираат сопствениците, ќе вршат редовни инспекции и, доколку се утврдат прекршоци, ќе имаат право сами да извршат чистење.
Противпожарната служба ќе изрекува казни и за неисчистени имоти и за неподнесување на потребните декларации.
Санкциите предвидуваат плаќање од 1 евро по квадратен метар за неисчистена површина, со минимална казна од 200 евра и максимална од 2.000 евра. За сопственици кои ќе го исчистат имотот, но нема да поднесат декларација, се предвидува глоба од 100 евра. Доколку прекршокот веднаш се коригира, можно е намалување на казната.
Законот воведува и итни механизми за интервенција во ситуации со висок ризик од пожари, вклучително и официјално расчистување без согласност на сопственикот, како и можност за продолжување на роковите во случаи на лоши временски услови.
Со овие мерки, грчките власти настојуваат навремено да ги спречат катастрофалните пожари кои последните години предизвикуваат огромни штети и човечки загуби.
