Украинскиот претседател Володимир Зеленски потврди дека со американскиот претседател Доналд Трамп се водат разговори за можноста од распоредување американски војници во Украина, во рамки на идните безбедносни гаранции. Информацијата ја пренесе украинската новинска агенција Укринформ.
Одговарајќи на новинарско прашање дали САД би можеле да испратат свои сили – било долж линијата на разграничување или на украинската граница – Зеленски нагласи дека конечната одлука е исклучиво во рацете на Вашингтон.
„Искрено, тоа може да го потврди само претседателот на САД. Станува збор за американски војници и Америка е таа што носи такви одлуки. Секако, ова е тема за која разговараме и со претседателот Трамп и со претставници на Коалицијата на волни“, изјави Зеленски.
Тој додаде дека Киев би сакал присуство на американски трупи на својата територија, оценувајќи дека таквиот чекор би претставувал силна и јасна безбедносна гаранција во идниот период.
Од друга страна, Трамп претходно изјави дека е постигнат „значителен напредок“ во разговорите за завршување на војната, по неговата средба со Зеленски одржана во неделата, 29 декември, во неговата резиденција Мар-а-Лаго, во сојузната држава Флорида.
Изјавите доаѓаат во момент на засилени дипломатски активности околу украинскиот конфликт, при што можноста за директно американско воено присуство би претставувала сериозен пресврт во досегашната безбедносна архитектура на регионот.
