Индонезиските власти го подигнаа нивото на тревога поради засилена вулканска активност на вулканот Бур Ни Телонг и упатија итно предупредување до локалното население и туристите да се оддалечат најмалку четири километри од кратерот.
Надлежните изразија загриженост дека комбинацијата од обилни врнежи и зголемената вулканска активност може значително да ја отежне евакуацијата на жителите од најмалку три села, кои се наоѓаат на околу два километра од вулканот.
Според Геолошката агенција при Министерството за енергетика и минерални ресурси, во текот на ноќта е регистрирана зголемена сеизмичка активност, со повеќе вулкански потреси кои биле почувствувани во радиус од околу пет километри.
Индонезија се наоѓа во таканаречениот Тихоокеански огнен прстен, регион познат по честите земјотреси и вулкански ерупции. Во земјата има вкупно 127 активни вулкани, поради што ваквите состојби се внимателно следени од страна на надлежните институции.
