Украинскиот претседател Володимир Зеленски јавно објави дека годишнината од руската инвазија, 24 февруари, не може да се користи за претседателски избори. Со тоа тој директно одговори на очекувањата на администрацијата на Доналд Трамп, кои „Фајненшл Тајмс“ ги објави како план за избори и можен референдум за мировен договор до 15 мај.
„24 февруари е посебен датум. Тоа се четири години војна. Луѓето ја бранеа земјата и ги дадоа своите животи. Не можам да го искористам овој ден за политика“, напиша Зеленски на социјалната мрежа Икс.
Украина е во воена состојба од 24 февруари 2022 година, а Уставот не дозволува избори за време на конфликт. Зеленски потенцира дека безбедноста и јасни гаранции се предуслов за гласање.
Вашингтон, според извештајот на „Фајненшл Тајмс“, очекува Киев да обезбеди план за избори и мировен договор со Москва до крајот на јуни, пред среднорочните избори во САД. Зеленски, сепак, постави сопствена „црвена линија“ – безбедноста на граѓаните е приоритет.
Украинските функционери нагласуваат: „Ако Русите секојдневно убиваат луѓе, како можеме сериозно да размислуваме за избори во наредните недели? Никој не е против избори, но мора да има безбедност.“
Во меѓувреме, Русија, и по четири години војна, се уште нема целосна контрола над Донбас, а Путин повторува дека нема да се откаже од регионот.
