Тешка несреќа ја потресе Германија утрово, откако три лица, меѓу нив млада жена, бебе и малолетно девојче, загинаа за време на велигденски настан во шумска област кај Сатрупхолм, во општина Мителангелн. Според германската полиција и повеќе меѓународни медиуми, големо дрво паднало врз група луѓе додека учествувале во потрага по велигденски јајца.
Според досега објавените информации, на местото на несреќата животот го загубиле 21-годишна жена и 16-годишно девојче, додека 10-месечно бебе подоцна им подлегнало на повредите во болница. Уште едно 18-годишно девојче било тешко повредено и пренесено со хеликоптер на лекување.
Несреќата се случила околу 11 часот, а на терен веднаш биле испратени бројни пожарникари, медицински екипи и спасувачки служби. Според извештаите, во акцијата учествувале околу 80 лица, додека на местото биле повикани и тимови за психолошка поддршка поради силниот шок кај присутните.
Медиумите наведуваат дека во моментот на несреќата во шумата имало околу 50 учесници, а германската метеоролошка служба претходно издала предупредување за силен ветер во тој регион. Токму силните налети, според првичните проценки, довеле до уривање на дрвото.
Трагедијата предизвика силни реакции во Германија, каде многумина останаа во неверување дека семеен празничен настан може да заврши на ваков начин.
