Северна Кореја лансираше повеќе балистички ракети со краток дострел кон Источното море, соопшти денес јужнокорејската армија.
Според информациите, детектирано е лансирање на ракети од областа Вонсан во Северна Кореја околу 8:50 часот по локално време. Ракетите прелетале околу 240 километри, пренесува агенцијата Јонхап.
Ова е четврти потврден случај оваа година во кој Пјонгјанг лансирал балистички ракети.
„Нашата армија внимателно ги следи различните потези на Северна Кореја во рамките на силната заедничка одбранбена структура на Јужна Кореја и САД и го одржува капацитетот и распоредот за да одговори на секоја провокација на супериорен начин“, соопшти Здружениот Генералштаб, додавајќи дека јужнокорејските и американските разузнавачки служби ги следеле движењата при лансирањето и блиско разменувале релевантни информации.
Лансирањето се случи само еден ден откако Северна Кореја испрати непознат пројектил од областа Пјонгјанг, кој сè уште е предмет на анализа. Се верува дека пројектилот, кој бил испратен во вторникот наутро, исчезнал кратко по лансирањето, па се претпоставува дека бил неуспешен, наведува Јонхап.
Ли: Непотребни воени тензии со Пјонгјанг Низастопните лансирања следеле по изјавата на претседателот на Јужна Кореја, Ли Џае Мјунг, кој изразил жалење што поединци испратиле дронови од Јужна Кореја кон својот северен сосед.
На состанокот на кабинетот, Ли изјавил дека инцидентите предизвикале непотребни воени тензии со Пјонгјанг.
Неколку часа по изјавата на Ли, Ким Џо Џонг, сестрата на севернокорејскиот лидер Ким Џонг Ун, издаде соопштение во кое се наведува дека севернокорејскиот шеф на државата оценил дека Ли покажал „искрен став и дека е широкоглед“.
Сепак, таа го предупреди Сеул да „запре секоја непромислена провокација“ против Пјонгјанг и да „се воздржи од секој обид за контакт, наместо само да зборува за најголемата важност на мирот и безбедноста“.
