Страшна несреќа се случи во минхенскиот округ Оберзендлинг, каде 82-годишен жител на Минхен го загуби животот откако автомобил бил смачкан на депонија за старо железо, без да биде забележано дека во него има човек.
Според информациите од полицијата, возилото било уредно закажано за уништување. Се претпоставува дека постариот маж влегол во автомобилот незабележано, во момент кога тој веќе бил подготвен за обработка и дробење.
Во времето на несреќата, 60-годишен работник управувал со тешка машина – кран наменет за сечење и дробење стари автомобили. Тој најпрво го смачкал покривот на возилото, а потоа го превртел наопаку, како дел од стандардната процедура за уништување.
Дури по овие дејствија, сведок забележал дека во автомобилот има лице. Веста за трагичниот настан ја пренесе и BBC.
Од здобиените повреди, 82-годишникот починал на лице место. Итните служби веднаш биле повикани, а на терен интервенирале пожарникари, екипи на брза помош и полиција. Поради сериозноста на ситуацијата, пожарникарите морале да употребат специјална опрема за да го извлечат телото од целосно деформираното возило.
Портпарол на полицијата изјавил дека автомобилот не му припаѓал на починатиот. Се верува дека мажот, кој живеел во Минхен, дошол на локацијата со намера да собира старо железо. Засега не е познато како точно влегол во возилото и зошто не бил забележан пред да започне процесот на уништување.
Сообраќајната полиција во Минхен започна официјална истрага за да ги утврди сите околности што довеле до оваа трагедија и да се разјасни дали станува збор за несреќен случај или евентуален пропуст во безбедносните процедури.
