Голема меѓународна полициска акција резултираше со апсење на седум лица осомничени за перење пари од трговија со кокаин, поврзани со италијански мафијашки структури. Меѓу уапсените е и црногорски државјанин, кого Европол го означил како еден од најбараните бегалци. Тој бил приведен во Кан, Франција, каде што наводно се криел со своето најблиско семејство.
Истрагата започнала во јануари 2023 година, откако швајцарските власти откриле сомнителни финансиски активности поврзани со италијански државјанин со бизнис интереси во Швајцарија и Франција. Со формирање на заеднички истражен тим преку Европол и Евроџаст, во кој учествувале истражители од повеќе европски земји, биле следени финансиските текови што воделе до сложена криминална мрежа.
Според наводите, групата била вмешана во перење пари преку фиктивни компании, лажни фактури и инвестиции во недвижности. Истражителите поврзуваат дел од мрежата и со запленет кокаин во пристаништето Антверпен.
Осомничениот поседувал имот во регионот Алп-Маритим, како и компании поврзани со фирми во Италија. Неговата сопруга, исто така од Црна Гора, се сомничи дека имала улога во шемата. Таа е ќерка на лице познато на европските служби по трговија со дрога.
Во Франција се запленети недвижности, луксузни возила и готовина во вредност од околу 5 милиони евра, додека во Италија биле конфискувани дополнителни 25 милиони евра. Вкупната запленета имотна вредност достигнува 31 милион евра.
Истрагата продолжува паралелно во неколку европски држави.
