Европските власти ја разбија организираната криминална мрежа која шверцувала кокаин од Јужна Америка кон Европа, соопштија надлежните институции. Истражувањето било координирано меѓу Исланд, Литванија и Шпанија, со поддршка од Европол и Евроџаст, а се верува дека групата остварила околу 4 милиони евра преку масовна трговија со дрога.
Истрагата кулминирала на 4 февруари 2026 година, кога биле уапсени 24 лица: единаесетмина во Исланд, шестмина во Литванија, четворица во Шпанија, двајца во Белгија и еден во Данска.
Истражителите утврдиле дека криминалната група го координирала транспортот на кокаинот од Јужна Америка до Исланд преку Шпанија и други дестинации. Дрогата најчесто била скриена во пакети од по еден килограм меѓу легална стока во транспортни контејнери, но мрежата постојано ги менувала методите за да ги избегне контролите, користејќи техники за заобиколување на скенери и кучиња-трагачи.
Во рамките на мрежата, главна улога имале „курири“ – луѓе во ранлива положба, убедувани да пренесуваат дрога. Кокаинот најчесто бил крен во багаж или пренесуван внатрешно, со голтање пакувања со дрога, а во некои случаи бил транспортиран и во течна форма. По пристигнувањето во Исланд, дрогата била дистрибуирана локално, додека нелегалните приходи биле перени преку инвестиции во недвижности и други имоти во Литванија.
Литванските и исландските власти соработувале во рамки на Европол, формирајќи заедничка истражна екипа во Евроџаст. Со помош на координациони состаноци во Хаг, биле идентификувани осомничени во Белгија, Данска, Исланд, Литванија и Шпанија, а аналитичката поддршка од Европол им помогнала на националните власти да ги мапираат врските и структурата на криминалната мрежа.
