Турскиот претседател Реџеп Таип Ердоган официјално го претстави новиот интегриран систем за противвоздушна одбрана, познат под името „Челична купола“, кој Турција го развива со целосна поддршка од домашната воена индустрија. Церемонијата се одржа во седиштето на компанијата Aselsan во Анкара, каде што Ердоган го нарече проектот „историски момент“ за турската национална безбедност.
„Овој проект е симбол на новата ера во нашата воздушна одбрана. Турција станува посилна и побезбедна, не само за нас, туку и за нашите сојузници, додека кај непријателите внесува страв,“ изјави Ердоган, потенцирајќи дека се работи за систем кој вклучува 47 специјализирани возила со вкупна вредност од околу 400 милиони евра.
„Челичната купола“ е иновативен, интегриран одбранбен систем кој обединува копнени и поморски платформи, радари и сензори, со крајна цел – максимална заштита на турскиот воздушен простор. Иако точниот датум на комплетна оперативност не беше објавен, системот се смета за еден од најсофистицираните на Балканот и Блискиот Исток.
Ова не е првпат Турција да прави обид за јакнење на својата воздушна одбрана. Во 2019 година, Анкара набави руски С-400 системи, потег што предизвика силна реакција од САД и доведе до суспензија на договорот за F-35 борбени авиони, сериозно нарушувајќи ги одбранбените амбиции на земјата.
Меѓутоа, актуелната геополитичка состојба, вклучувајќи ги конфликтите во Сирија и Украина, како и недамнешните тензии меѓу Израел и Иран, дополнително ја мотивираа Турција да инвестира во домашна одбранбена технологија, со цел постигнување воена независност и оперативна сигурност.
Дополнително, Ердоган најави дека во 2026 година ќе бидат отворени нови производствени погони на Aselsan, со визија Турција во следните 50 години да стане земја која не само што ги задоволува своите одбранбени потреби, туку и извезува високотехнолошки системи на глобалниот пазар.
Турската инвестиција во воената индустрија не е од вчера – уште по ембаргото од САД во 1974 година, поради инвазијата на Кипар, земјата активно работи на намалување на зависноста од странски партнери. Системот „Челична купола“ е последниот чекор во таа стратегија и симбол на амбицијата на Турција да стане суперсила во областа на одбранбената технологија.
