Обвинителството на Кавадарци поднесе обвинение за возач со речиси целосно оштетен вид (99% слепило), кој со товарно возило удрил во жена пешак, предизвикувајќи ѝ тешки повреди – скршен череп и вратни пршлени, поради кои жената починала на лице место.
Шокантно е што, додека се водела истрагата, обвинетиот успеал да си ја продолжи возачката дозвола, и тоа и покрај тоа што имал инвалидска пензија за слепило и важноста на возачката му била истечена.
Обвинителството испратило известување до полицијата во Неготино за дополнителна проверка на начинот на добивање на возачката дозвола и инвалидската пензија, како и веродостојноста на медицинската документација.
Несреќата се случила на 3 декември 2024 година на регионалниот пат Лакавица-Дреново, кога обвинетиот управувал товарно возило „Ситроен џампер“ без важечка дозвола и со ретровизорот удрил во главата на пешачката Ангелина Ангелова, која починала од повредите.
Иако жената имала можност да го забележи возилото, не успеала да избегне ударот, а пропустот бил оценет како секундарен.
Обвинетиот е товарен за тешко дело против безбедноста во сообраќајот, со можност за повеќегодишна затворска казна.
Овој случај отвора сериозни прашања за контролата и безбедноста, како и за одговорноста на институциите во издавањето и продолжувањето на возачките дозволи.
