Основниот кривичен суд Скопје донесе пресуда со која поранешниот директор на КПУ Затвор Скопје – Шуто Оризари, Филип Андов – Сокол, е осуден на осум месеци затвор поради злоупотреба на службената положба и овластување.
Според пресудата, делото е сторено во соизвршителство и во продолжено траење, а судот утврдил дека во периодот од март до јули 2024 година обвинетите незаконски им овозможувале погодности на осудени лица. Наместо постапување согласно закон, затворениците биле спроведувани до нивните домови и други локации за приватни потреби.
Покрај Андов – Сокол, со пресудата се опфатени и уште неколку обвинети, на кои им се изречени условни осуди за злоупотреба на службената положба и за несовесно работење во службата. За нив судот одреди рокови на проверка во траење од една до три години.
Судот оценил дека ваквите постапки претставуваат сериозно прекршување на законските процедури и злоупотреба на довербата која ја носи службената функција, особено во институција како што е казнено-поправната установа.
Пресудата не е правосилна, а странките имаат право на жалба до Апелационен суд Скопје.
