Во само два дена, на 26 и 27 јули, полицијата изрече повеќе од 1.100 казни за сообраќајни прекршоци, при што најчести беа оние за возење со прекумерна брзина, управување без возачка дозвола и под дејство на алкохол.
Од вкупниот број санкции, дури 128 возачи беа фатени без возачка дозвола, додека 115 возачи возеле под дејство на алкохол и веднаш биле исклучени од сообраќајот. Дополнително, 46 моторциклисти биле санкционирани поради неносење заштитен шлем, што значително го зголемува ризикот на патиштата.
Непочитувањето на ограничувањето на брзината останува најраспространет прекршок, со вкупно 458 казни изречени само за овој прекршок. За неправилно паркирање биле санкционирани 175 лица, а 28 возачи биле казнети за неползување на сигурносен појас. Исто така, 17 возачи биле казнети за користење мобилен телефон додека управувале возило.
Полицијата регистрираше и сериозни прекршоци: тројца возачи поминале на црвено светло, додека двајца пешаци и тројца возачи на електрични тротинети исто така биле санкционирани.
Во рамките на контролните активности, 31 нерегистрирано возило било отстрането од сообраќај, а дополнително три возила биле исклучени поради техничка неисправност.
Министерството за внатрешни работи најави дека засилените сообраќајни контроли ќе продолжат во следните денови и упати апел до сите учесници во сообраќајот да ги почитуваат правилата заради зголемување на безбедноста на патиштата и намалување на ризикот од сообраќајни незгоди.
