Основниот кривичен суд Скопје ја објави пресудата за предметот со КОК бр. 98/25, кој се однесува на сериозни злоупотреби извршени од вработени во КПУ Затвор Скопје во Шуто Оризари. Судот ги огласи обвинетите за виновни за кривичните дела што им беа ставени на товар, при што беа ценети сите олеснителни и отежнителни околности во постапката.
Поранешниот директор на затворот „Скопје“, Филип Андов – Сокол, е осуден на ефективна казна затвор во траење од осум месеци за кривичното дело злоупотреба на службената положба и овластување. Судот утврди дека кривичното дело било сторено во соизвршителство и во продолжено траење, со што сериозно бил нарушен законскиот ред во функционирањето на установата.
На обвинетиот П.А., исто така обвинет за злоупотреба на службената положба и овластување, му е изречена условна осуда од шест месеци затвор. Казната нема да се изврши доколку во период од две години од правосилноста на пресудата не изврши ново кривично дело.
Обвинетиот Ѓ.Р. е прогласен за виновен за кривичното дело несовесно работење во службата и му е изречена условна осуда од три месеци затвор, со рок на проверка од една година. Иста казна, условна осуда од три месеци со рок од една година, судот му изрече и на обвинетиот С.П. за истото кривично дело.
За обвинетиот Т.Н., кој беше обвинет за злоупотреба на службената положба и овластување и за несовесно работење во службата, судот утврди единствена санкција – условна осуда од осум месеци затвор. Оваа казна нема да се изврши доколку во наредните три години не стори ново кривично дело.
Обвинетиот Е.О. е огласен за виновен за несовесно работење во службата и му е изречена условна осуда од шест месеци затвор, со рок на проверка од две години, додека обвинетиот К.В. доби условна осуда од три месеци затвор со рок од една година.
Од судот информираат дека пресудата не е правосилна и дека странките имаат право на жалба до Апелациониот суд Скопје.
Претходно, Обвинителството за организиран криминал и корупција поднесе обвинение против поранешниот директор на затворот „Скопје“, како и против повеќе затворски надзорници и полициски службеници. Со обвинението беа опфатени осум лица, додека за две лица постапката беше запрена поради недостиг на докази.
Според обвинителството, првообвинетиот, во својство на директор, заедно со двајца полициски службеници, како соизвршители, сторил продолжено кривично дело злоупотреба на службената положба и овластување. Дополнително, еден од полициските службеници бил обвинет и за несовесно работење во службата, дело за кое се товареа и останатите петмина обвинети.
Во обвинението се наведува дека во периодот од март до јули 2024 година, обвинетите со умисла извршиле повеќе меѓусебно поврзани дејствија при вршење на службените овластувања, при што на петмина осуденици им овозможиле незаконски погодности. Осудените лица биле спроведувани до своите домови и до други локации за приватни потреби, што било спротивно на законски пропишаната постапка за спроведување лица лишени од слобода надвор од казнено-поправна установа.
Истрагата за овој предмет беше отворена во февруари годинава против вкупно десет лица, но за две од нив постапката беше запрена поради недоволно докази.
