На 71-годишна возраст почина Ајзеа Витлок Помладиот, најпознат по улогата на корумпираниот државен сенатор Клеј Дејвис во култната серија „Жица“ (The Wire) и честите соработки со режисерот Спајк Ли.
Веста ја потврди менаџерот Брајан Либман преку социјалните мрежи, истакнувајќи дека Витлок починал мирно во Њујорк по кратка болест. „Го сакаа сите што имаа чест да работат со него или да го познаваат. Ќе ни недостига неизмерно“, напиша Либман.
Ајзеа Витлок Помладиот е роден во Саут Бенд, Индијана, а актерската кариера ја започнал по завршувањето на Американскиот конзерваториум за театар во Сан Франциско. За речиси четири децении се појавуваше во бројни серии и филмови, вклучувајќи „Закон и ред“, „Потпретседателка“, „Ваша чест“, како и проекти на стриминг-платформи.
Најголема препознатливост стекна со ликот на сенаторот Клеј Дејвис во сите пет сезони на „Жица“, оставајќи силен и незаборавен впечаток кај публиката ширум светот.
