Општина Бутел вечерва повторно беше во духот на македонската традиција, преку настан посветен на фолклорот и културното наследство. Настанот беше организиран од фолклорното студио „Плетеница“, со поддршка и покровителство на Општина Бутел, и се одржа во спортската сала Антон Димитров.
Целовечерниот концерт донесе богата програма исполнета со македонски ора, при што беа претставени дел од највпечатливите елементи на народната уметност. Настанот ја нагласи улогата на фолклорот како важна врска меѓу минатото и сегашноста, како и неговото значење во зачувувањето на националниот идентитет.
Македонската традиционална култура, со својата разновидност и автентичност, особено доаѓа до израз преку народните носии, кои со генерации се пренесуваат и го задржуваат својот препознатлив изглед. Токму тие претставуваат живо сведоштво за богатото културно наследство кое продолжува да се негува и денес.
Со ваквите културни настани се потсетува дека фолклорот не е само уметничка форма, туку и важен дел од духовниот идентитет на народот. Организаторите и учесниците упатија порака дека зачувувањето и промоцијата на традицијата останува заедничка одговорност на сите генерации.
