Сопругата на шпанскиот премиер Педро Санчез, Бегоња Гомез, влегува во нова и многу посериозна фаза од судскиот процес што со месеци ја потресува шпанската политика. Судијата Хуан Карлос Пеинадо ја заврши истражната постапка и предложи таа да оди на судење за повеќе наводни кривични дела, меѓу кои злоупотреба на влијание, деловна корупција, проневера и наводно незаконско присвојување.
Случајот почна во април 2024 година по пријава поднесена од групата „Манос Лимпијас“, а во фокусот се нејзините врски со универзитетски проекти, приватни компании и наводната употреба на политички и институционални контакти за лична или професионална корист. Шпанската влада цело време тврди дека нема никакво кривично дело и дека станува збор за политички мотивирана афера.
Овој развој дополнително го зголемува притисокот врз Санчез, чија влада и онака е под силни удари од опозицијата и од други истраги што ја оптоваруваат политичката сцена во земјата. Дел од шпанските министри жестоко реагираа на одлуката, оценувајќи дека случајот веќе предизвикал сериозна штета врз угледот на правосудниот систем.
Во моментот кога веста беше објавена, Бегоња Гомез се наоѓала во Кина заедно со Педро Санчез, што уште повеќе го засили вниманието на јавноста. Сега целата земја чека да види дали овој процес ќе прерасне во уште поголем политички товар за шпанскиот премиер во пресрет на следните изборни пресметки.
