Државната нафтена компанија на Саудиска Арабија, „Арамко“, соопшти дека продолжувањето на војната меѓу САД и Израел со Иран, која го блокира превозот низ Ормутскиот теснец, може да предизвика сериозни нарушувања на глобалните пазари на нафта.
Иако компанијата очекува да извезува околу 70% од вообичаеното производство, извршниот директор Амин Насер предупреди дека прекинот на транспортот може да има „драстични“ ефекти врз светската економија.
– Иако се соочувавме со прекини во минатото, ова е убедливо најголемата криза со која се соочила нафтената и гасната индустрија во регионот – изјави Насер.
Пратките на нафта од Блискиот Исток се блокирани од Ормутскиот теснец откако нападите на САД и Израел врз Иран пред 11 дена ги отстранија околу 20 милиони барели дневно од глобалниот пазар.
„Арамко“ сега се обидува да ги задоволи потребите на клиентите преку цевководот исток-запад до пристаништето Јанбу на Црвеното Море. Компанијата планира да ги зголеми пратките преку цевководот до полн капацитет од 7 милиони барели дневно во наредните денови, со што околу 5 милиони барели ќе бидат достапни за глобалниот пазар – околу 70% од вообичаениот извоз на Саудиска Арабија.
Вообичаено околу 100 танкери дневно минуваат низ Ормутскиот теснец, но бројот е намален на едноцифрена бројка по заканите од страна на Корпусот на Исламската револуционерна гарда, кој порача дека ќе „запали“ секој брод што користи трговската рута.
Како резултат на нарушувањето, цената на нафтата скокна до 119 долари за барел оваа недела, највисока вредност од 2022 година. Во вторникот, цената на суровата нафта тип Брент се тргуваше околу 91 долар.
Насер потенцираше:
– Ќе има катастрофални последици за светските пазари на нафта, а колку подолго трае нарушувањето, толку подрастични ќе бидат последиците за глобалната економија.
Министрите за финансии на Г7 се состанаа за да разгледаат планови за ослободување на стратешките резерви на сурова нафта, но не беше постигнат договор за нивно активирање, што се случувало само пет пати во историјата.
