Во ексклузивно интервју, Хантер Бајден – синот на поранешниот американски претседател Џо Бајден – откри дека неговиот татко зел апче за спиење Амбиен пред првата претседателска дебата со Доналд Трамп во јуни 2024 година. Според Хантер, тоа била една од клучните причини за лошиот настап што ја шокираше јавноста.
„Имаше 81 година, беше исцрпен од патувања, му дадоа Амбиен за да заспие… а потоа излезе на сцена како заслепен од светло“, изјави Хантер.
Слаб настап што доведе до повлекување
На дебатата, Бајден имаше рапав глас, неповрзани одговори и збунет настап, што отвори лавина прашања за неговото здравје и способност за втор мандат. Помалку од еден месец подоцна, тој се повлече од претседателската трка, отворајќи пат за Камала Харис да ја преземе кандидатурата од Демократската партија.
Иако тогашниот штаб на Бајден тврдеше дека се работи за „настинка“, неговото патување низ Европа и потенцијалната употреба на седатив ја разоткриваат позадината на дебаклот.
Истрага во Конгресот: Дали Бајден бил ментално подготвен?
Изјавата на Хантер може да има големи последици: републиканците во Претставничкиот дом веќе водат истрага за менталната способност на Бајден во последната година од неговиот мандат. Повикани беа тројца блиски соработници од Белата куќа, кои се повикаа на Петтиот амандман и одбија да сведочат.
Кој е Хантер Бајден?
Хантер е контроверзен лик – адвокат, бизнисмен и лобист, но и личност со долга историја на зависност, афери и правни проблеми. Тој преживеал трагедија уште како дете, кога во сообраќајна несреќа загинале неговата мајка и сестра. Подоцна завршил на Јеил, работел за банки и владини агенции, но неговата кариера постојано била засенета од приватни и правни скандали.
Во 2024 година беше осуден за оружени и даночни прекршоци, но татко му го помилува пред крајот на мандатот.
