Сериозно предупредување пристигна од Амбасадата на САД во Тирана – американските државјани во Албанија се повикани на зголемена претпазливост поради можни закани поврзани со групи блиски до Иран.
Според безбедносното известување, потенцијални цели може да бидат не само објекти поврзани со САД, туку и јавни места како трговски центри, хотели, ресторани и туристички локации.
Предупредувањето доаѓа во чувствителен момент на засилени тензии меѓу Албанија и Иран, особено поради присуството на иранската опозиција во земјата и претходните сајбер напади за кои Тирана го обвини Техеран.
Иако албанските власти велат дека нема конкретни информации за непосредна опасност, безбедносните служби се ставени во состојба на зголемена готовност.
Од амбасадата им препорачуваат на граѓаните да бидат внимателни, да ја следат ситуацијата преку медиумите и да избегнуваат ризични локации, додека комуникацијата и подготвеноста за итни ситуации се клучни.
