Од вчера, 26 февруари 2026 година, е воведена целосна забрана за движење по планинарската и пешачката патека кон кањонот Матка. Причината е висок ризик од уривање на карпи и одрони кои можат сериозно да ги загрозат животите на посетителите.
Забраната не е само препорака, туку официјална мерка за безбедност, донесена од надлежните органи. Одлуката е издадена од Општина Сарај на 19 февруари, а се темели на стручен акт од Дирекцијата за заштита и спасување (број 57-2071-1).
„Забраната стапува во сила од денеска и ќе важи сè додека опасноста на теренот не се отстрани“, појаснуваат надлежните.
Апел до граѓаните: Се повикуваат сите планинари, туристи и љубители на природата строго да ја почитуваат забраната и да не го ризикуваат својот живот, ниту животот на спасувачките екипи. Движењето во овој дел од Матка е строго забрането додека не се соопшти дека патеката повторно е безбедна за користење.
