Иако човештвото со векови слуша предвидувања за апокалипса од Нострадамус, Исак Њутн и други, модерниот научник Лук Кемп од „Кембриџ“ нуди реалистичен и технолошки поткрепен аларм – според него, светот би можел да заврши за само 25 години.
Кемп го посветил својот живот на проучување на пропаста на минатите цивилизации и прави паралели со денешното општество, каде луѓето се секојдневно поврзани преку интернет и мобилни уреди. Според него, најголемата закана за човештвото не е само нуклеарна војна, која може да ја активира дури и еден претседател, туку структурното „самоуништување“ на современите општества.
Во својата книга „Голијатовата клетва: Историјата и иднината на општествениот колапс“, Кемп објаснува дека цивилизациите пропаѓале поради експлоатација од страна на мал број елити, што доведувало до корупција, осиромашување, внатрешни конфликти, деградација на животната средина и лоши одлуки. Таквите општества на крајот се распаѓале поради болести, војна или климатски промени.
Кемп го истакнува и Карингтоновиот настан од 1859 година – огромна електромагнетна бура од Сонцето, која денес би предизвикала уништување на глобалната електрична инфраструктура. Без струја би се прекинале компјутерите, интернетот, банкарскиот систем и сателитската комуникација, што би создадало хаос на целата планета.
Според Кемп, шансите за ваков катастрофален настан се зголемуваат за 20,3% на секои 10 години, што значи дека до 2050 година веројатноста е 50 проценти.
Научникот предупредува дека човештвото мора да се подготви за можни технолошки и општествени катастрофи, доколку сака да ја избегне трагичната судбина на минатите цивилизации.
