Секоја година, при уписите на првачињата, наставниците и директорите се соочуваат со огромен притисок од родителите, кои сакаат да го одредат не само кое дете ќе биде во која паралелка, туку и кај кој наставник ќе падне. Родителите често инсистираат: „Оваа наставничка не е добра за моето дете“ или „Овој наставник не сакам да го учи детето“. Некои дури бараат нивното второ дете да има истиот наставник како првото.
И покрај ваквите притисоци, наставниците велат дека се обидуваат да го почитуваат системот и да ја зачуваат професионалната интегритет. Една одделенска наставничка истакна дека притисокот честопати ја надминува границата, а директорите се тие кои најмногу го чувствуваат. „Нѐ избираат како да сме лубеници на пазар, тоа е неблагодарно“, изјави таа.
Директорката на ООУ „Јохан Хајнрих Песталоци“, Катерина Атанасова, нагласи дека постапува согласно законот: учениците од реонот имаат приоритет, а потоа се примаат деца од другите реони доколку има простор. „Немам никаков притисок од Општината или Министерството, а родителите може да имаат барања, но ако нема простор, не можеме да ги испочитуваме“, вели Атанасова.
Директорот Никола Стојковски од ООУ „Страшо Пинџур“ додаде дека притисоците се секоја година, понекогаш од неколку страни за едно дете. И покрај тоа, училиштето има практика да им овозможи на родителите да изберат наставник, а доколку е возможно, желбите се исполнуваат. „Воопшто не е коректен ваквиот однос од страна на родителите, но тие продолжуваат да пробуваат да ги исполнат своите желби на секој можен начин“, заклучува Стојковски.
