Инстаграм почна постепено да ја воведува долго бараната опција за уредување на веќе објавени коментари, со што корисниците конечно ќе можат да ги исправат грешките без да мора да го бришат целиот коментар и повторно да го пишуваат. Според објавените информации, измените ќе бидат можни во рок од 15 минути по објавувањето.
Новата функција дозволува повеќекратни измени во тие 15 минути, а по секоја корекција ќе стои ознаката дека коментарот е „изменет“. Сепак, нема да постои јавна историја на промените, односно другите корисници ќе можат да видат дека нешто е уредувано, но не и што точно било сменето. Дополнително, може да се менува само текстот на коментарот.
Иако на прв поглед станува збор за мала промена, новитетот може значително да го смени начинот на комуникација на платформата. Досега, секоја печатна грешка, погрешно напишана мисла или недоволно јасна реченица значеше едно решение – бришење и ново пишување. Со новата опција, разговорите ќе течат поприродно, а корисниците ќе можат побрзо да ги средат своите реакции.
Но, токму тука почнува и дебатата. Дел од корисниците ја поздравуваат можноста како корисно олеснување, особено за исправка на ситни грешки, додека други стравуваат дека функцијата може да внесе забуна во дискусиите. Причината е едноставна – ако некој го измени коментарот откако веќе добил реакции, другите ќе знаат дека е сменет, но нема да знаат што точно било напишано претходно.
Инстаграм со ова очигледно се обидува да најде рамнотежа меѓу практичноста и транспарентноста. Ограничувањето од 15 минути изгледа како обид да се дозволат брзи поправки, но да не се отвори простор за подоцнежно целосно менување на смислата на разговорот. Функцијата веќе се појавува кај дел од корисниците, а се очекува наскоро да биде пошироко достапна.
