Премиерот Христијан Мицкоски најави дека наскоро ќе започне довршувањето на пругата кон Бугарија, проект што со години беше блокиран. Тој истакна дека веќе е обезбедена техничка поддршка од Европската инвестициона банка, која ќе овозможи ревизија на основниот проект и целосната документација, по што ќе следи јавен повик за изградба на третата фаза.
„Со ова ќе ја заокружиме делницата од Куманово до границата со Бугарија, која е дел од Коридорот 8. Од другата страна, процесот веќе напредува, што значи дека наскоро ќе имаме комплетно завршен коридор“, изјави Мицкоски, додавајќи дека ова е историски момент за Македонија.
Тој нагласи дека ваквата поврзаност ќе овозможи нашата држава да стане крстосница на два исклучително значајни паневропски коридори – Коридорот 8 и Коридорот 10. Според него, сите досегашни пречки се надминати и е постигната согласност со источниот сосед.
Истовремено, Мицкоски посочи дека работите на Коридорот 10, кои се дел од проектот со британската влада, се веќе во напредна фаза.
Со оваа инфраструктурна офанзива, Македонија се доближува кон исполнување на својата стратешка цел – да биде клучна транспортна раскрсница на Балканот.
