Директорот на УНРВА, Филип Лазарини, предупреди дека Појасот Газа се претвора во „гроб на меѓународното хуманитарно право“ поради продлабочувањето на хуманитарната катастрофа и колапсот на меѓународниот одговор на повеќемесечната блокада и уништување на територијата. Според него, гладот во Газа е предизвикан од човекот – Израел од 2 март ѝ забранил на УНРВА да внесува помош, иако на границите со Египет и Јордан има повеќе од 6.000 камиони храна доволни за два месеца.
Лазарини нагласува дека дел од конвоите што сепак влегле биле ограбени од очајни цивили, а луѓето почнуваат да умираат од глад, додека помошта е достапна, но систематски им е спречено да ја примат. Тој го обвини Израел дека води кампања за делегитимизирање на УНРВА и дека преку обвинувања против вработени и прекини на финансирање се обидува да го ослаби палестинското право на враќање и самоопределување.
Директорот на УНРВА предупредува и за растечко насилство и присилно раселување на Западниот Брег, што дополнително ја загрозува регионалната безбедност. Лазарини истакнува дека неактивноста на меѓународната заедница кон Израел ја потврдува ерозијата на меѓународното хуманитарно право, додавајќи дека Женевските конвенции станале „мртва буква на хартија“.
Тој исто така предупреди дека продолжувањето на сегашниот курс може да доведе до втора Накба, со што Газа би престанала да биде земја за Палестинците, што ќе резултира не само со хуманитарна, туку и со политичка катастрофа. Лазарини заклучи дека решението за две држави останува клучно за иднината на регионот.
