Премиерот Христијан Мицкоски изјави дека Македонија денес се гради како никогаш досега, со повеќе од 1.200 активни градилишта ширум државата. Тој нагласи дека од централниот буџет се префрлени над половина милијарда евра кон општините, што претставува преседан во инфраструктурните инвестиции, спротивно на минатото кога, како што рече, „Македонија се крадеше, а денес Македонија се гради“.
Мицкоски им се заблагодари на сите вклучени во проектите – потпретседателот на Владата, министерот за транспорт, директорот на ЈП „Државни патишта“, пратениците и вработените во министерството, истакнувајќи дека нивниот придонес е клучен за динамиката на развојот.
Тој посочи дека, со додавање на капиталните проекти на централно ниво, инвестициите се во вредност од неколку милијарди евра, а уште толку се планираат во наредните години.
Во делот за патната инфраструктура, Мицкоски потсети на експресниот пат од Страцин до Крива Паланка, нагласувајќи дека тендерската процедура за јавна набавка наскоро ќе започне и патниот правец ќе овозможи патување од Скопје до Крива Паланка за помалку од 45 минути.
Премиерот заклучи дека со големите православни празници доаѓаат и позитивни вести за граѓаните, особено во рамки на проектите за Коридорот 8, кои значат реконструкција и продолжување на изградбата на патните правци.
