По повеќе од еден месец од страшниот пожар во дискотеката „Пулс“ во Кочани, надежта полека се враќа – уште еден од повредените пациенти, кој се лекуваше во болница во Истанбул, конечно се врати дома. Во Скопје, во „Аџибадем Систина“, сè уште остануваат двајца тешко повредени, но нивната состојба е стабилна и не се критични.
Директорот на Фондот за здравствено осигурување, Сашо Клековски, потврди дека физикалната терапија на сите повредени продолжува без прекин. Дополнително, во Македонија пристигнал и врвен пластичен хирург од Белгија, кој направил детална проценка за секој пациент на кој му е потребна реконструктивна интервенција. Целта е не само враќање на функцијата на изгорените екстремитети, туку и овозможување на естетски изглед – за жртвите да можат повторно да живеат нормален живот.
На дури 18 пациенти им е потребна пластична и естетска операција, но лекарите велат дека сè уште е прерано за такви интервенции. Сепак, директорката на болницата во Кочани нагласи дека кај некои жртви ќе бидат неопходни хируршки зафати за враќање на функцијата на прстите од рацете, бидејќи токму тие биле најмногу оштетени во пожарот.
Овој случај повторно ја потсетува јавноста на ужасијата од таа ноќ, но и на огромната сила и борба на младите кои успеаја да преживеат.
