Планираното воведување на зонското паркирање во Аеродром доживеа неочекуван пресврт – стартот на зоната Д12 е одложен на неодредено време.
Од ЈП Градски паркинг Скопје информираат дека одлуката е донесена по насоки од Град Скопје и Општина Аеродром, но и по директни реакции од граѓаните кои побарале пролонгирање.
Иако зоната Д12 – Реонски Центар требаше да започне со работа од 1 април 2026 година, институциите решиле да го стопираат процесот сè додека не се завршат сите подготовки. Тоа значи дека новиот режим нема да стапи во сила додека не се направи целосно усогласување на сообраќајниот проект и не се постави соодветна сигнализација.
Во меѓувреме, ќе се работи и на доуредување на другите планирани зони, вклучително и Д11 во Ново Лисиче, со цел целиот систем да функционира без проблеми и дополнителен притисок врз жителите.
Надлежните уверуваат дека ова одложување е во интерес на граѓаните, за да се избегнат хаос и недоразбирања при стартот.
Сепак, останува неизвесно кога точно ќе започне новиот режим – прашање кое сега ги држи жителите во неизвесност.
