Министерството за здравство соопшти дека екстремниот топлотен бран кој ја зафати државата ќе трае најмалку до 26 јули. Температурите ќе надминуваат 40°C, а најпогодени се децата, постарите, хронично болните и бремените жени.
Со цел да се заштитат најранливите, Владата донесе одлука – сите бремени жени и лица постари од 60 години да бидат ослободени од работа од 23 до 26 јули. Работодавците се повикани да овозможат работа од далечина или флексибилно работно време, каде што е можно. Овие мерки не важат за критичните служби, како здравство, полиција, транспорт и слично.
Исто така, од 11 до 17 часот се забранува работа на отворено, а во установите мора да се обезбедат разладени простории со температура до 25°C. Активирани се протоколи за вонредни состојби во болници, старски домови и училишта.
Надлежните апелираат граѓаните да не се изложуваат на сонце, да пијат многу течности, да носат лесна облека и да внимаваат на симптоми како гадење, вртоглавица и забрзан пулс – при што е неопходно веднаш да се побара лекарска помош.
