Францускиот автомобилски гигант Рено најави дека планира значително намалување на работната сила во својот глобален инженерски сектор, што би можело да опфати помеѓу 15 и 20 проценти од вработените.
Според плановите на компанијата, ова би можело да засегне околу 2.000 луѓе во наредните две години, како дел од поширока реорганизација на работењето и прилагодување на новите пазарни услови.
Иако не се зборува директно за класични откази, компанијата најавува дека промените ќе се спроведат преку преквалификации, внатрешни преместувања и доброволни програми за заминување, како и предвремено пензионирање.
Реструктуирањето е дел од стратегискиот план наречен „FutuReady“, кој има цел да ја прилагоди компанијата на зголемената глобална конкуренција, особено од производители од Кина.
Според најавите, инженерските активности ќе бидат реорганизирани во три главни сегменти – развој на возила, адаптација на постоечки платформи и индустријализација на производство во фабриките ширум светот.
Најголем дел од инженерскиот кадар моментално е лоциран во Франција, каде се наоѓа и главниот технички центар на групацијата, но компанијата нагласува дека клучните развојни активности ќе останат во матичната земја.
Одлуката доаѓа во време на засилена конкуренција во автомобилската индустрија, особено во сегментот на електрични возила, каде европските производители се соочуваат со силен притисок од азиските конкуренти.
