Во неделата навечер се случил брутален напад во село во околината на Лесковац, при што 44-годишниот Игор У. се здобил со тешки телесни повреди опасни по живот.
Според неофицијални информации објавени од Блиц, на инцидентот му претходела расправија меѓу двајца мештани – жртвата Игор У. и 24-годишниот Петар С. Се сомнева дека и двајцата биле под дејство на алкохол кога ситуацијата ескалирала.
Нападот се случил пред домот на жртвата. Според првичните сознанија, осомничениот најпрво го удрил Игор со дрвена мотка по главата. Откако жртвата паднала на земја, напаѓачот продолжил да го удира со раце и нозе по главата и телото, нанесувајќи му сериозни повреди, вклучително и скршеница на черепот.
Од Министерство за внатрешни работи на Србија соопштија дека осомничениот се товари дека на 5 април 2026 година, по кратка расправија, му задал повеќе удари на 44-годишниот маж и му нанел тешки телесни повреди.
По налог на Основното јавно обвинителство во Лесковац, на осомничениот му е одредено задржување до 48 часа, по што ќе биде изведен пред обвинител со кривична пријава.
