Во центарот на Софија се случи вознемирувачки инцидент кога лице, за кое бугарските медиуми пишуваат дека е иподјакон Атанас Стефанов од Бугарска православна црква, го запрел службеното возило на Надежда Нејнски, министерката за надворешни работи.
На видеата споделени на социјалните мрежи се гледа свештеникот облечен во мантија, со крст во рацете, како стои пред возилото и не дозволува тој да продолжи со движење. Иподјаконот го запрел возилото на централниот влез на Министерството за надворешни работи и упатувал навредливи зборови кон министерката.
Според медиумите, Стефанов побарал одговори во врска со користењето на државниот авион и побарал разјаснување за тоа зошто државата се вклучува во одредени дејства, предизвикувајќи вербален конфликт пред зградата на министерството.
