Четири одделни пожари избувнаа во текот на денот на планинските подрачја на Општина Желино, потврди Центарот за управување со кризи (ЦУК). Огнените јазици се појавија кај селото Мерово на планината Сува Гора и во близина на селото Церово на планината Жеден. Благодарение на брзата и организирана интервенција на надлежните служби, сите пожари биле ставени под целосна контрола.
Во Церово активно интервенирале екипи од Тетово, додека во Мерово, пожарникарите работеле заедно со службите на „Национални шуми“. Состојбата внимателно се следи од ЦУК, кој останува во постојана координација со другите институции.
Директорот на ЦУК, Мухамед Али, јавно изрази загриженост и остро осуди ваквите случаи, истакнувајќи дека намерното палење пожари претставува закана за природата, за животот на граѓаните, но и за иднината на младите генерации.
Сомневања дека пожарите не се случајни изнесе и градоначалникот на Желино, Блерим Сејдиу. Тој преку својот Фејсбук профил потсети дека пред само неколку недели, веднаш по отворањето на булеварот во Желино, се појавија пожари на планините кај Групчин и Церово. Сега, според него, сценариото се повторува токму во момент кога општината објавува нови проекти. „Работиме за развој, но некој очигледно работи за уништување“, напиша Сејдиу, нагласувајќи дека појавата е премногу чудна за да биде случајна.
ЦУК испрати апел до сите граѓани за максимална претпазливост и одговорно однесување. Од таму предупредуваат дека секое невнимание или свесно подметнување може да предизвика огромни штети по луѓето, животната средина и природните богатства.
