Владата на Бугарија одлучи речиси 80 проценти од пензионерите да добијат велигденски додаток, со цел да се поддржат најранливите граѓани за време на празникот, објави Факти.бг. Вкупно повеќе од 1,6 милиони постари лица ќе бидат опфатени со оваа мерка.
Хасан Адемов, министер за труд и социјална политика, соопшти дека пензионерите со пензија или вкупни приходи до линијата на сиромаштија од 390,63 евра ќе добијат по 50 евра, додека оние со приходи од пензии од 390,64 до 629,20 евра, колку што изнесува минималната плата, ќе добијат по 20 евра велигденски додаток.
Министерот посочи дека претходно само околу 33 проценти од пензионерите добивале додатоци за Велигден и Божиќ, бидејќи исплатата се однесувала исклучиво на лицата со пензии до линијата на сиромаштија. Со новата одлука, кругот на корисници се проширува и ги опфаќа и оние со примања до минималната плата.
За реализација на оваа мерка се потребни 57,8 милиони евра, а Адемов изрази надеж дека идниот парламент ќе ги усвои предложените измени во Законот за социјална помош. Со нив, поддршката би се проширила и на други ранливи категории, вклучувајќи лица со попреченост, семејства со ниски приходи и социјално загрозени граѓани.
