Во одделенијата каде што секунда може да одлучи меѓу живот и смрт, недостигот од медицински сестри станува критичен проблем што директно ја загрозува здравствената грижа. Најтешката состојба е во анестезија, реанимација и интензивна нега, каде работниот притисок расте, а кадарот се намалува.
Од Македонското здружение на медицински сестри за анестезија, реанимација и интензивна нега предупредуваат дека ситуацијата одамна излегла од рамки на обичен кадровски недостаток и станува системски ризик за пациентите.
Претседателката на здружението, Јулијана Казанџиска, истакнува дека идеалниот стандард во овие одделенија треба да биде една медицинска сестра на еден пациент, но дека реалноста е далеку поинаква. Во пракса, една сестра се грижи за четири до пет критично болни пациенти истовремено, кои бараат постојан мониторинг и брза реакција.
Овој дисбаланс, според неа, создава сериозен притисок врз персоналот и го зголемува ризикот за грешки во услови кога секоја интервенција е временски чувствителна.
Дополнително, се нагласува дека медицинските сестри во интензивна нега треба да имаат специјализирана едукација која ќе биде системски призната и соодветно вреднувана. Без тоа, професијата останува недоволно заштитена и демотивирана.
Како клучни причини за одливот на кадар се наведуваат ниските плати, ограниченото професионално признание и високото ниво на стрес. Дел од медицинските сестри, како што се посочува, заминуваат во странство во потрага по подобри услови и повисоко вреднување на трудот.
Овој тренд создава дополнителен притисок врз здравствениот систем, бидејќи одделенијата за интензивна нега остануваат со сè помал број на персонал, иако се најкритични за функционирањето на болниците.
Темата беше истакната и на третиот конгрес на здружението одржан во Скопје, каде учествуваа домашни и странски експерти. Целта на собирот беше унапредување на професијата, размена на искуства и подобро меѓународно поврзување на медицинските сестри во оваа област.
